ஈரான் ஜனாதிபதித் தேர்தலில் ஹசன் ரோஹானி வெற்றி பெற்றுள்ளார்.
அங்கு கடந்த 14ஆம் திகதி ஜனாதிபதித் தேர்தல் நடைபெற்றது. இதில் வாக்குரிமை பெற்ற 3 கோடியே 67 லட்சம் பேர் வாக்களித்தனர்.
சுமார் 72.7 சதவீதம் வாக்குப் பதிவானதாக அந்நாட்டு உள்துறை அமைச்சு அறிவித்தது.
இதில், ஒரு கோடியே 86 லட்சம் வாக்குகள் (50.68 சதவீதம்) பெற்று ஹசன் ரோஹானி(65) வெற்றி அடைந்துள்ளார்.
இவர் ஈரானின் 7 ஆவது ஜனாதிபதியென்பது குறிப்பிடத்தக்கது.
கடந்த 2003ம் ஆண்டு ஈரான் அதிபராக கடாமி பொறுப்பு வகித்தபோது அணு உலைகளின் செயல்பாட்டை முடிவுக்கு கொண்டுவர வேண்டும் என்று வாதிட்டவர் ரோஹானி என்பது குறிப்பிடத்தக்கது.
பின்னர் பொறுப்பேற்றுக்கொண்ட அஹமடி நிஜாட் ஆட்சியில் மீண்டும் அணு உலைகள் உற்பத்தியை தொடங்கியதால் அமெரிக்கா உள்ளிட்ட நாடுகளின் பகைக்கு ஈரான் உள்ளாகியது.
இதனால் ஈரானின் நாணயமான ரியாலின் அன்னிய செலவாணி மதிப்பு எப்போதும் இல்லாத அளவிற்கு 70 சதவீத சரிவை சந்தித்தது.
இதனையடுத்து, ஈரானின் தற்போதைய பணவீக்கம் 30 சதவீதம் அதிகரித்துள்ளது.
தென்கிழக்கு தெஹ்ரானில் உள்ள சோர்கே நகரில் 1948ம் ஆண்டு பிறந்த ரோஹானி, ஸ்கொட்லேண்டில் உள்ள கிளாஸ்கோ கேலடோனியன் பல்கலைக் கழகத்தில் சட்டம் பயின்று பட்டம் பெற்றவர்.
திருமணமாகி 4 குழந்தைகளுடன் வாழும் இவர், ஈரான் முன்னாள் ஜனாதிபதி அயாத்துல்லா கோமேனியுடன் சுமுகமான உறவைப் பேணி வருகிறார்.
இவரது ஆட்சிக் காலத்தில் அமெரிக்காவுடனான பிணக்கு நீங்கி எண்ணெய் வளம் மிக்க ஈரான் பொருளாதார ரீதியாகவும் முன்னேறும் என மக்கள் எதிர்பார்க்கின்றனர்.
இதேவேளை இவரது வெற்றியை மக்கள் கொண்டாடி வருகின்றனர். குறிப்பாக ஈரானிய இளைஞர்கள் இவருக்கு ஆதரவாக வீதிகளில் திரண்டு கொண்டாட்டங்களில் ஈடுபட்டுள்ளனர்.
No comments:
Post a Comment
உங்கள் கருத்துக்கள் வரவேற்கப்படுகின்றன.