ஒலுவில் துறைமுக நுழை வாயிலை மறித்து போராட்டம்

(ஹனீக் அஹமட்)

ஒலுவில் துறைமுக நுழை வாயிலை மறித்து அட்டாளைச்சேனை பிரதேச சபைத் தவிசாளர் எம்.ஏ.அன்சில் தலைமையில் இன்று வெள்ளிக்கிழமை காலை போராட்டமொன்று இடம்பெற்றது. 


இப் பிரதேசத்தில், ஆழ்கடல் மீன்பிடித் தொழிலில் ஈடுபடுகின்றவர்களின் மீன்களை துறைமுக நுழை வாயிலினூடாக வெளியேற்றுவதற்கு துறைமுக அதிகாரிகள் மறுப்புத் தெரிவித்ததையடுத்து, பிரதேச சபைத் தவிசாளர்  எம்.ஏ.அன்சில் தலைமையில் பிரதேச சபை உறுப்பினர்கள், மீனவர்கள் மற்றும் பொதுமக்கள் இணைந்து இந்த போராட்டத்தில் ஈடுபட்டனர்.

ஆழ்கடல் மீன்பிடித் தொழிலில் ஈடுகின்றவர்களின் படகுகள் அசாதாரண சூழ்நிலைகளின் போது ஒலுவில் துறைமுகத்தில் தரிப்பதற்கும், அவர்களின் மீன்களை துறைமுக வாயிலினூடாக வெளியேற்றுவதற்கும் கடந்த சில வருடங்களாக அனுமதிக்கப்பட்டு வந்ததாகத் தெரிவிக்கப்படுகிறது. 

துறைமுக நிர்மாணப் பணியில் ஈடுபட்டு வந்த வெளிநாட்டு நிறுவனத்தினரே இந்த அனுமதியினை வழங்கியிருந்தனர். 

ஆனால், சில வாரங்களுக்கு முன்னர் ஒலுவில் துறைமுகத்தினை - துறைமுகங்கள் அதிகாரசபையினர் பொறுப்பேற்றுக் கொண்டதன்  பின்னர், துறைமுகத்தினூடாக மீன்களை வெளியேற்றுவதற்கு அனுமதி மறுக்கப்பட்டு வருவதாக மீனவர்கள் கூறுகின்றனர். 

இந்த நிலையில், இன்றைய தினமும்  துறைமுகத்துக்குள் நுழைந்துள்ள படகின் மீன்களை துறைமுக நுழைவாயிலினூடாக வெளியேற்றுவதற்கு அனுமதிக்குமாறு கோரி  இப்போராட்டம் இடம்பெற்றது. 

இதன்போது, ஒலுவில் துறைமுக சிரேஷ்ட பயிற்சி முகாமையாளர் யூ.எல்.ஏ.நஜீப் போராட்டத்துக்குத் தலைமை தாங்கிய அட்டாளைச்சேனை பிரதேச சபை தவிசாளர் அன்சிலுடன் பேச்சுவார்த்தையில் ஈடுபட்டார்.

இதனையடுத்து, துறைமுகத்தில் தற்போது தரித்துள்ள படகிலிருக்கும் மீன்களை துறைமுக நுழைவாயிலினூடாக வெளியேற்றுவதற்கு துறைமுக நிர்வாகத்தினர் அனுமதி வழங்குவதாக தெரிவித்தனர்.







(tamilmirror)