எதிர்வரும் செப்டெம்பர் மாதம் தேர்தல் நடைபெறவுள்ள வடக்கு, வடமேல் மற்றும் மத்திய மாகாணங்களில் உள்ள அனைத்து மாவட்டங்களினதும் செயலாளர்களை தேர்தல்கள் ஆணையாளர் மஹிந்த தேசப்பிரிய இன்று செவ்வாய்க்கிழமை சந்தித்து பேச்சுவார்த்தை நடத்தவுள்ளார்.
செப்டெம்பர் மாதம் நடைபெறவுள்ள தேர்தலுக்கான மாவட்ட ரீதியான ஏற்பாடுகள் மற்றும் அவை தொடர்பான செயற்பாடுகள் தொடர்பில் இந்த சந்திப்பின்போது விரிவாக கலந்துரையாடப்படவுள்ளது.
மேலும், மாவட்ட ரீதியில் நாளை மறுதினம் 18 ஆம் திகதி முதல் இயங்கவுள்ள முறைப்பாட்டு அலுவலகங்கள் குறித்தும் அரசியல் கட்சிகள் மற்றும் வாக்காளர்களிடம் இருந்து முறைப்பாடுகளை பெறுவது குறித்தம் தேர்தல் ஆணையாளரும் மாவட்ட செயலாளர்களும் ஆராயவுள்ளனர்.
வட மாகாணத்தில் யாழ்ப்பாணம் கிளிநொச்சி, வவுனியா, முல்லைத்தீவு, மன்னார் ஆகிய மாவட்ட செயலாளர்களும் வடமேல் மாகாணத்தின் புத்தளம் மற்றும் குருணாகல் மாவட்ட செயலாளர்களும் மத்திய மாகாணத்தின் நுவரெலியா, கண்டி மற்றும் மாத்தளை மாவட்ட செயலாளர்களும் தேர்தல் ஆணையாளருடனான சந்திப்பில் கலந்துகொள்ளவுள்ளனர்.
வடக்கு, வடமேல் மற்றும் மத்திய மாகாண சபைகளுக்கு மொத்தமாக 142 உறுப்பினர்களை தெரிவுசெய்யும் நோக்கில் 43 இலட்சத்து 58 ஆயிரத்து 261 பேர் வாக்களிப்பதற்கு தகுதிபெற்றுள்ளனர். தேர்தல் செப்டெம்பர் மாதம் 21 அல்லது 28 ஆம் திகதி 2012 ஆம் ஆண்டுக்கான வாக்காளர் இடாப்பின் பிரகாரம் நடைபெறவுள்ளது.
மூன்று மாகாண சபைகளுக்குமான வேட்பு மனுக்களை இம்மாதம் 25 ஆம் திகதி முதல் ஆகஸ்ட் மாதம் முதலாம் திகதிவரை தாக்கல் செய்யலாம். சுயேச்சைக் குழுக்களுக்கான கட்டுப்பணங்களை இம்மாதம் 31 ஆம் திகதி நண்பகல் 12.00 மணிக்கு முதல் செலுத்தவேண்டும் என தேர்தல்கள் செயலகம் அறிவித்துள்ளது.
(மூலம்: http://www.virakesari.lk/article/local.php?vid=5908 )
No comments:
Post a Comment
உங்கள் கருத்துக்கள் வரவேற்கப்படுகின்றன.